Para sa ‘yo ang laban na ‘to
Ngiga gyud aning kantaha oi…
Hahaha, sukad sa pagkadaug ni Manny Pacquiao pipila ka adlaw na ang nilabay daghan ko’g nadungog nga mga reaksyon mahitungod sa iyang kadaugan. Tingala lang ko… Hinuon dili man ko usa ka eksperto mahitungod anang BOXING, pero nahibulong gyud ko. Ngano? Kay katong adlaw sa iyang away, naningkamot gyud ko uban sa akong igsoon nga makatanaw ug LIVE. Naswertehan kay adunay usa ka bagong kananan sa Obrero nga ginganlan ug Brewtique nga gapasundayag sa maong away ni pacman. Tag 200 ang kada usa ka tawo nga motanaw pero dili man lugi kay aduna may pagkaon nga gaawas-awas. Oo, way undang ang hukad sa pagkaon mao nga dili gyud lugi. Uban akong igsoon akong asawa ug akong anak nitanaw mi sa away ni pacman ug didto nako mabati nga tinuod gyud ang suporta sa mga pinoy kay Manny.
Sa sugod sa away (kay paspas man walay advertisement) medyo alanganin ang dagan kay maayo gyud tinuod moaway si Marquez apan sa dihang nahilukapa si Marquez sa usa ka kusog nga walang kinumo ni Manny sa ikatulong hugna pirting kalipay sa mga tawo didto sa sulod sa gambalay. Akong nahunahunaan nga mura mi ug mga taga europa nga ug mananaw ug soccer (futbol) grabe gyud kasaba ug magdungan gyud ug paninggit labi na nga nakaigo ug sakto. Pirting kurata sa akong anak kuyawan ko kay makabungol ang kasaba namo :D. Misunod ang pipila ka gutlo ug nagpadayon nga nindot ang away ug nagpakita si Marquez sa iyang kabangis. Apan bisan pa man, wala gyud nya napalukapa si Manny butang nga mahinungdanon sa nahimong disisyon pagkahuman sa away nila. Daghan moingon nga tabla o’bin ba kaha daog si Marquez, pero kung ako pasultihon OK ra pud kaayo ang disisyon nga midaog si Manny kay iya mang napalukapa si Marquez ug iyang napamatud-an nga kaya nya ang kinumo ni Marquez kay wala man gyud sya milukapa.
Apan taliwala sa mga diskusyon ug mga kukabildo, ako gyu’ng paaboton ang sunod nga panagsangka nilang duha.
