Ug sa ikatulong adlaw
Pipila na ka adlaw ang nilabay
Ulan sa syudad perminti ug kanunay
Sa pikas bahin sa probinsya mao usab
Inanay ug tagdugay ang paghilak sa panganod
Sa dihang wa na makaya sa mga kahoy paghawid sa yuta
Diha-diha dayong midahili ang yuta
Yuta nga daw lapok inubanan sa mibanlas nga tubig
Dayon bungkag ug tabon sa mga panimalay
Pagkapait ba diay niining kinabuhi
Sayon ra kaayong kuhaon ug mobalos ang kinaiyahan
Kinaiyahan nga gipanamastamasan
Aron ang gakutoy nga tiyan masudlan
Pagkapait pamalandungon nga tawo ra gihapon
Ang gagama niining natagamtam nato karon
Kanus-a pa mapakgang kining mga suliran?
Aron trahedya atong malikayan…
Ug sa ikatulog adlaw mikitiw ug misidlak si haring adlaw…
Daw nagpahimangno ug nagpadayag nga “hoy tawo pagmata”
Ug kinaiyahan paga ampingan ta…
