Balak, Pulong ug Hudyaka

Basin unya ug matingala ka o di ba kaha gahuna-huna nga ang akong ipadayag karon kay mahitungod sa gugma. Gugmang giatay…

Apan dili… Sayop ka higala. Pag-ibig Fund ang akong buot ipasabot ug buot ipaibot :).

Niadtong mga niaging mga adlaw gitawagan ko sa developer sa balay nga akong gikuha pipila ka bulan na ang nilabay. Miingon ang babaye (taga developer) nga paandamon na ko kuno ko ug kwarta ibayad sa “takeout fee ug 1st monthly ammortization” kay aprobado na kuno ang akong loan sa Pag-Ibig ug pwede na makuha akong balay (o mapuy-an).

Una ko nakakuha ani nga “housing unit” ako kining giaplayan ug “loan” utang sa Pag-Ibig kay ako usab membro man niini. Apil sa proseso ang pagtambong sa usa ka seminar isip rekisito una dawaton ang imong “loan application”. Kahinumdum gyud ko niadtong mitambong ko sa seminar, ingon sa usa ka empleyado sa Pag-Ibig (kadtong nangulo sa seminar)  “ayaw gyud ninyo dawata (i-accept) ang unit ug dili mo satisfied o daghan pa mog reklamo sa balay… amo man pud nang i-inspect ang unit ug aron klarohon kung misunod ba sila sa saktong plano o ang tama nga plastada sa balay”.

Taud-taud na nga nahuman ang akong balay ug pipila na ka bulan nga ako kining gibisita ug sa akong pagpaniid adunay mga guba, wa matarong ug wa mahuman nga mga parte sa balay. Ako kining gireklamo sa developer apan wala pa silay sistema kung unsaon o di ba kaha nilikay lang sila sa mga reklamo. Pipila ka bulan ang nilabay, kay akong gitagaan sila’g ug lugway, wala gihapon maayo (wala mataud ang kulang… ug wala trabahoa ug tarong) ang akong balay. Sa laktod nga pagkasulti dili pa gyud angayan nga dawaton ang akong balay isip “human ug kumpleto na sa pagkagama/pagkahimo” kay aduna pa man koy reklamo.

Niadtong nitawag ang taga developer kanako, ako silang giingnan nga dili usa ko mobayad o dili sa nako dawaton (i-accept) ang balay kay daghan pa man ko ug reklamo. Nagtuo ko nga kinahanglan pa nakong dawaton ang balay una bayaran sa Pag-Ibig ang akong balay kay sama sa ilang pagkaingon sa seminar nga dili pa dapat i-accept ug naa pay reklamo (o wa pa mahuman) ug ila man pud kining i-inspect una bayran. Niadto ko sa Pag-Ibig kay ako untang ireklamo ang proseso sa developer nga ipadawat ang balay bisan wa pa mahuman. Apan, labihan nakong kurata sa dihang ako nang gisusi sa Pag-Ibig ang akong nasinatian. Animal… pagka way klaro… aduna na man diay na silay kasabutan nga bayran daan ang mga balay sa borrower bisan pa man wala pa madawat/maaccept ug tarong ug bisan pa man adunay mga reklamo sa balay. Sa laktod, ang akong balay gibayran na sa Pag-Ibig bisan pa man aduna pa koy reklamo niini ug bisan pa man wala pa nila mainspect ang akong balay. Gilaliman ba gud ka anang kalakiha, bayaran na daan una pa nila makita o madawat ang balay bisan ug daghan ug reklamo. Ingon nila aduna kunoy program nga gitawag ug “Buy Back Guarantee” nga gahatag ug permiso sa mga developer nga moproseso sa tanang rekisitos ug dayon bayran sila sa Pag-Ibig pag kumpleto na kini bisan pa man wala pa gitugot o giaprobahan sa nagloan (sama nako) ang iyang gikuhang balay. Sukwahi kini sa ilang programa ug giingon nga una dawaton kinahanglan sakto ug nahimo sa developer ang balay sa tama nga desayn o plano.

Makahugno ug kalibutan ang gihimo sa Pag-Ibig… Ngano? Kay mipabor na man hinuon sila sa mga siguristang developer pinaagi sa pagbayad daan sa balay bisan ug ang “principal borrower” wala pa niaprob sa balay nga iyang giloan. Asa na ang ilang pagpanalipud sa katungod sa ilang mga myembro aron dili abusohon sa mga siguristang developer? Ngano man nga ingon ani ang ilang pamaagi? Di ba katungod sa “principal borrower” ug isip usa ka myembro sa pag-ibig nga makasiguro nga ang iyang balay nga gibayran (o bayranan) naa sa saktong kundisyon una kini niya dawaton? Ug tama ba nga bayaran daan sa Pag-Ibig ang mga siguristang developer bisan pa man wala pa nila mainspect (og daghan pag reklamo) ang balay?

Kaninyo nga adunay susama niani nga kasinatian, hinaut unta nga magpadayag mo sa inyong gibati aron malamdagan ang tanan.

  Share